У Кули Кирбай з владиком

автор мст
981 Опатрене

КУЛА – Грекокатолїцка парохия св. Йосафата у Кули вчера, 27. новембра, шветочно преславела храмово швето – Кирбай. Архиєрейску Службу Божу предводзел владика Георгий Джуджар, а сослужели о. Владимир Седлачок зоз Словацкей, як и священїки з наших парохийох – парох рускокерестурски о. Михайло Малацко, парох коцурски о. Владислав Рац, парох шидски о. Михайло Режак, парох новосадски о. Юлиян Рац, парох старовербаски о. Алексей Гудак и  керестурски капелан о. Владимир Медєши, парох новововербаски о. Иґор Вовк споведал , а шицких привитал и Кирбай повинчовал домашнї  о. Платон Салак.

4-Kula-02

Владику Георгия привитали и виронаучни дзеци на руским и на українским язику и подаровали му букет квеца.

Кир Георгий вирним повинчовал Кирбай, а у своєй казанї на руским и на українским язику бешедовал о духовним шведоченю св. Йосафата, котри, як гварел, наш заступнїк и приклад як треба жиц по християнскей вири.

Архиєрейску Службу Божу зоз шпиваньом возвеличала и шпивацка ґрупа з Руского Керестура, хторей дириґовала Лидия Пашо.

На концу Богослуженя владика помировал шицких парохиянох и їх госцох, котри пришли у вельким чишлє. Пре диждж нє бул обход коло церкви, а у церковней сали отримане друженє и закуска за шицких присутних, хтору пририхтали шестри Служебнїци и парохиянє.

Пред Кирбайом, од 22. по 24. новембер, о. Платон Салак и шестри Служебнїци орґанизовали духовну обнову вирних.

4-Kula-03

ПОВЯЗАНИ ТЕКСТИ