МИКЛОШЕВЦИ – На швето Рождества Богородици (Малу матку Божу), у Миклошевцох вчера преславени Кирбай. У грекокатолїцкей церкви з меном Мацери Божей отримани два служби Божо – Ранша на 8 и Велька на 11 годзин, а предводзел их парох раєвоселски о. Олеґ Закалюк, котрому то було перше богослуженє у миклошевскей парохиї.
У казанї о. Закалюк визначел Марийово вредносци по хторих препровадзела свой живот – виру, надїю и любов, а хтори, як гварел, у нєшкайших обставинох часто забути. Прето на шицких християнох зачувац их и пренєсц на потомкох – визначел о. Закалюк.
Попри нього, у Велькей Служби Божей сослужовали парох вуковарски и декан сримски Крижевского владичества о. Владимир Маґоч, парох петровски о. Владимир Седлак, а з Апостолского еґзархату за грекокатолїкох у Сербиї парох шидски и декан сримски о. Михайло Режак и декан беоґрадски и парох у Беоґрадзе и Сримскей Митровици о. Владислав Варґа. Службу зоз шпиваньом провадзели дзияк Тонко Лїкар и домашнї парох, викар славонско-сримски Крижевского владичества о. Яким Симунович.
О. Симунович подзековал шицким же возвелїчали швето, а Миклошевчанє на Кирбаю мали госцох з рижних местох у Горватскей и Войводини.
По Служби бул одпустови обход коло церкви з читаньом штирох Євангелийох , а пред уходом до церкви о. Закалюк подзелєл благослов свяшанїком, шицким вирним, а окреме о. Симуновичови, котри на тот дзень пред 45 роками пошвецени за священїка. Присутни му ювилей повинчовали и з Многолїтствийом.