У Миклошевцох Стретнуце руских школох

автор маф/зам
885 Опатрене

МИКЛОШЕВЦИ – Нєшка у миклошевскей Подручней школи ОШ Чаковци у Горватскей на 11 годзин шветочно будзе отворене 21. Стретнуце руских основних и штреднїх школох з местох дзе ше наставу орґанизує по руски и зоз школох у хторих ше руски язик виучує як виборни предмет з елементами националней култури у Сербиї и як руски язик и култура у Горватскей.

После отвераня ушлїдзи културно-уметнїца програма, а потим школяре и їх наставнїки нащивя грекокатолїцку церкву у Миклошевцох и ОШ у Чаковцох. Пополадню, на 14,30 г. буду орґанизовани литературна и подобова роботня, а Стретнуце будзе закончене з додзельованьом припознаньох на 16 годзин.

Под час Стретнуцох, на 14,30 г. у миклошевскей школи будзе и схадзка Активу наставнїкох руского язика, на хторей буду представени и кнїжки „Жвератко нашей младосци” Дюру Лїкара и Фото-каталоґу о 20 стретнуцох руских школох, од 1994. по 2014. рок.

Стретнуце руских школох у Миклошевцох ше отримує под покровительством Министерства науки, образованя и спорту Републики Горватскей, а у рамикох означованя 165-рочнїци приселєня Руснацох до Миклошевцох.

Вєдно з домашню школу, Стретнуце орґанизує Дружтво за руски язик, литературу и културу з Нового Саду, його Секция у Миклошевцох, а з финансийну потримовку Националного совиту Руснацох у Сербиї.

ПОВЯЗАНИ ТЕКСТИ