КУЛА – У рамикох Централней шветочносци означованя националного швета Руснацох у Сербиї, у Кули всоботу, 16. януара, у просторийох домашнього Руского КУД „Др Гавриїл Костельник” отримани шаховски турнир, цо була и перша манифестация Централней шветочносци.
Бавени швидко-цагаюци, „цуґер” турнир, а участвовали 17 шахисти и бавел кажде з каждим.
После 16 одбавених колох, перше место освоєл Небойша Павков, друге Милорад Ледєнац, треце др Стеван Перич, шицки з Кули. Штварти по числу освоєних бодох бул Чавро Коларич з Вербасу, пияти Владо Лазор з Кули, котри бул и орґанизатор турниру. Партиї судзел союзни судия Милан Остоїч.
Побиднїки достали символични награди – шаховску годзинку, шаховску ґарнитуру и шаховску литературу.
Гоч на змаганє нє пришли представителє шицких котри були поволани, орґанизаторе турниру задовольни, насампредз же на нїм участвовали и ведети того спорту, як цо то професор у пензиї Иван Пап з Руского Керестура, котри шах бави уж вецей як 60 роки.