У тим тижню Кирбаї у Митровици и Беоґраду

автор мгк/маф
935 Опатрене

СРИМСКА МИТРОВИЦА/БЕОҐРАД – У наступаюцим тижню буду два Кирбаї у наших грекокатолїцких парохийох – у Сримскей Митровици – 21. мая, у Беоґрадзе 24. мая, а у обидвох парох о. Владислав Варґа.

У Сримскей Митровици Кирбай на швето Вознєсения Господнього, и на тот дзень архиєрейска Служба Божа будзе на 10,30 годзин, кеди будзе означена 110-рочнїца од будованя нашей церкви у тим городзе. После Служби Божей будзе рижнородна програму, а першираз наступя члени дзецинскей шпивацкей ґрупи „Сримски квиточки”. Наймладши ше за тот наступ рихтали у рамикох креативней роботнї у парохийним доме.

Програму отвори Ясна Димитришин-Арбанас хтора пречита свой лирски попатрунок на приселєнє Руснацох и Українцох зоз старого краю и їх живот у сримскей ровнїни, а будзе и єй вистава старих церковних сликох и документох, як и малюнкох у олєю.

Кирбай на дзень славянских апостолох Кирила и Методия у нашей парохиї у Беоґрадзе будзе 24. мая преславени зоз Службу Божу на 11,30 годзин у каплїци у Вишеґрадскей улїци ч. 23, а того дня и штверо школяре приму першу св. Причасц.

У обидвох парохийох по Службох Божих буду пририхтани и пригодни културно-уметнїцко-духовни програми.

ПОВЯЗАНИ ТЕКСТИ