РУСКИ КЕРЕСТУР – У голу Основней и штреднєй школи з домом школярох „Петро Кузмяк” у Руским Керестуре вчера вечар шветочно отворена вистава фотоґрафийох „Шерцо у уметносци – уметносц у шерцу” Андреи Новак з Коцура.
Вистава фотоґрафийох дакедишнєй школярки керестурскей Штреднєй школи орґанизована з нагоди нєдавного швета Дня залюбених, та виложена 21 уметнїцка фотоґрафия з тему любови, а годно ю опатриц шлїдуюци два тижнї.
Виставу орґанизовала и отворела педаґоґиня Школи Любица Няради котра, привитуюци Новакову, наглашела же Школа и на таки способ дава потримовку и афирмує своїх дакедишнїх школярох.
На отвераню вистави наступели наймладши школяре керестурского Оддзелєня ШОМО и штредньошколци з Дому школярох, котри интерпретовали любовну поезию сербских поетох.
Андреа Новак тераз студент другого року на Висшей технїчней школи у Новим Садзе, напрям применєна фотоґрафия, и то єй перша векша самостойна вистава. Пред двома роками у Керестуре закончела штредньошколски напрям Туристични технїчар.
