ЖАБЕЛЬ – На порядней рочней Скупштини Дружтва писательох Войводини (ДПВ), хтора внєдзелю, 19. априла отримана у Жаблю, сообщена Одлука Управного одбору ДПВ же медзи 12 новоприятима членми, до Дружтва писательох Войводини прияти и Валентина Чизмар з Вербасу и Микола М. Цап з Коцура.
На початку зашеданя дата почесц упокоєним членом ДПВ медзи двома схадзками Скупштини, медзи нїма и Штефанови Гудакови, котри умар початком того року.
Скупштина мала и шветочну часц, понеже на нєй уручени рочни награди ДПВ. Награду за кнїжку рока достал др Зоран Дєрич, за литературно-историйску студию „Поетика бездумносци”, Награду за преклад рока достала др Мария Ненадич, за преклад поезиї Тодора Манойловича зоз сербского на румунски язик, док Награду „Васко Попа” достал Йоан Баба, за окремне доприношенє румунско-сербским вязом и медзисобному прекладаню, як и за поетску и прекладательну творчосц.