ЖАБЕЛЬ – Вчера у Спортскей гали у Жаблю школяре од першей по штварту класу основних школох з општини мали явну годзину, на хторей прикаали спортски схопносци хтори научели у безплатней школи спорту.
На штирох спортских полиґонох 120 школяре указали схопносци з вецей спортох, як цо то ґимнастика, з атлетики скаканє до далєка и до висока, уруцованє лабди до кошу и друге. Вєдно з нїма вежбали и дзеци з окремнима потребами зоз Здруженя „Алтруист” зоз Жаблю.
Проєкт финансує Союз за школски спорт Сербиї, а уж треци рок за шором витворюю го професоре физичней култури у школох, з потримовку Општини, здруженя „Спорт за шицких” Општини Жабель и Спортского союзу Општини Жабель, хтори и ношитель проєкту.