БЕОҐРАД – Медиї хтори предати у першим кругу приватизациї ище вше формално нє маю власнїка, понеже контракти медзи Аґенцию за приватизацию и новима власнїками 22-ох медийох нє подписани.
Здруженє новинарох Сербиї (УНС) реаґовало на таки стан, понеже тоти медиї вецей нє финансую општини и городи, а без преношеня власнїцтва, вони нє можу конкуровац на конкурси за проєктне софинансованє хтори розписую Министерство култури и информованя и локални самоуправи.
З Аґенциї за приватизацию одвитовали же дотераз зазберовали потребну документацию, та у наиходзацих дньох почнє и подписованє контрактох.
УНС сообщело же и Радована Ковача, котри купел Информативно-пропаґандни центер Кула, ище вше нє волали на подписованє контракту, гоч му гварене же то будзе 15 до 20 днї по лицитациї, хтора була 1. септембра.