ВЕРБАС – У парохиї Покрова Пресвятей Богородици у Старим Вербаше преславене швето Квитней нєдзелї. Вельке число вирнїкох було на Служби Божей, котру служел парох старовербаски о. Алексий Гудак.
Як визначел о. Гудак у казанї, з багнїтками витаме уход Исуса Христа до Єрузалиму, то нашо барз любене швето. Церковни одбор старовербаскей парохиї постарал ше порихтац багнїтки за парохиянох, а по законченю Служби Божей шицки багнїтки були и подзелєни.
Служба Божа за Паску будзе на 10 годзин, а того дня по законченю богослуженя будзе традицийне пошвецанє кошаркох зоз паскалним єдзеньом у церковней порти.
У Змаєве, дзе о. Гудак обслужує грекокатолїцких вирних, тиж означена Квитна нєдзеля, пошвецени багнїтки, а присутне було красне число парохиянох.
И у парохиї Святого Владимира у Новим Вербаше внєдзелю преславена Квитна нєдзеля. Парох нововербаски о. Данил Задрепко служел Вельку Службу Божу и пошвецел багнїтки з нагоди того швета.
Церква того дня була полна, а числени вирни провадзели богослуженє з молитву. По законченю Служби Божей, парохиянє багнїтки однєсли их до своїх домох.
На нєдзелю и у нововербаскей парохиї будзе преславене вельке християнске швето – Велька ноц.
