СУБОТИЦА – Главна, закончуюца прогрaма Бунєвацкeй Дужиянци отримана штварток, 15. авґуста у Суботици, дзе после благодарней Служби Божей у Церкви Воздвижения честного крижа, бул дефиле од Бунєвацкей матки по централну площу.
Тогорочни бандаш Александар Надь и бандашка Дуня Такач придали хлєб зоз тогорочного жита предсидательки Националного совиту Бунєвцох др Сузани Куюнджич Остоїч. Вона на бини, на хторей була културно-уметнїцка програма, визначела же Бунєвци горди народ, любя свой язик, културу и обичаї и цитирала познатого писателя хтори гварел же „у бою нє победзує швицаце оружиє, алє шерцо юнака”.
Националне швето Дзень Дужиянци шицким Бунєвцом винчовал помоцнїк городоначалнїка Суботици Срдян Самарджич и покраїнски секретар за образованє, предписаня, управу и национални меншини Роберт Отот.
У културно-уметнїцкей програми хтора була пошвецена Дню Дужиянци свойо жатвово обичаї представело КУД Жатва зоз Коцура. То резултат сотруднїцтва Националного совиту Руснацох и Националного совиту Бунєвцох, хтори водза подобну борбу у витворйованю своїх националних правох.
Женска шпивацка ґрупа одшпивала венчик руских народних шпиванкох, а дзецинска фолклорна ґрупа танєц у хторим часц дзе одтанцована популарна коцурска Парадича достала найвекши аплауз. Зоз членми КУД була предсидателька Дружтва и предсидателька Одбору за образованє Националного совиту Руснацох Мелания Мали и уметнїцка руководителька Кристина Горняк. Спред Националного совиту Руснацох бул предсидатель Вивершного одбору Желько Ковач.
Бунєвацка Дужиянца почина 25. априла на дзень св. Марка кед ше на польох пошвеца жито и тирва по Вельку матку Божу, 15. авґуст, кед ше отримує Дзень Дужиянци, националне швето бунєвацкей националней меншини. Дужиянца ма вецей манифестациї.
