МИКЛОШЕВЦИ – Грекокатолїцки вирни у Миклошевцох Крачун преславели зоз Службу Божу у церкви Рождества Пречистей Дїви Мариї, а служел о. Яким Симунович, парох миклошевски. Домашнїм парохияном и їх госцом о. Симунович пречитал Крачунску винчованку владики крижевского, кир Николи Кекича, а швето повинчовал и у мено Церковного одбору и свойо власне. Служба була крашнє нащивена и числени вирни приступели обряду причащаня.
Традицийне шпиванє по валалє почало после Вилїйовей вечери, кед дзеци и млади ходзели по родзинох, сушедстве и приятельох винчовац Крачун.
На Вилїю о. Симунович на 23 г. служел Всеночне, а Службу возвелїчали и млади гудаци Матей Бурчак, Денис Гарди и Иван Лїкар, котри одграли и одшпивали даскельо коляди. По Всеночним орґанизовани огньомет, а друженє Миклошевчанє предлужели у виронаучней сали.
Млади гудаци з Миклошевцох з колядами Крачун повинчовали и парохови петровскому о. Владимирови Садлакови, пред Всеночним у Петровцох.
