КОЦУР – З нагоди 250-рочнїци першей грекокатолїцкей церкви у Коцуре и 100-рочнїци приселєня часних шестрох служебнїцох до Коцура, всоботу, 29. авґуста, у валалскей читальнї у Коцуре отримана промоция моноґрафиї коцурскей церкви Успения Пресвятей Богородици „Чувар вири, язика и руского народа”, автора проф. др Михайла Фейсу.
Моноґрафию видали видавательней хижи „Прометей” з Нового Саду, КПД „ДОК” з Коцура и грекокатолїцкей парохия у Коцуре, а на промоциї ю представели єй рецензенти – мр Валентина Чизмар, о. др Борис Холошняй и проф. др. Юлиян Рамач, котри пречитали часци своїх рецензийох и визначели свойо замеркованя о кнїжки. И рецензенти и автор визначели же моноґрафия направена за народ, присподобена обичному читательови, та прето будзе глєдана и читана.
На промоциї присуствовал и представитель Управи за сотруднїцтво з церквами и вирскима заєднїцами при Министерстве правди Ґаврило Ґрба, хтора и финансовала друкованє тей моноґрафиї. Видаванє финансийно помогли и орґанизация „Кирхе и нот” и рижни поєдинци-донаторе.
Моноґрафию, у хторей история грекокатолїцкей церкви у Коцуре през вецей етапи написана на дацо вецей як сто бокох, краши и вельке число фотоґрафийох, а видрукована є у штиристо прикладнїкох. Нащивителє на промоциї прикладнїк достали задармо, а познєйше ю годно купиц за 300 динари.
