ВЕРБАС – У Вербаше штварток означена городска слава и храмове швето Вознесениє Господнє зоз шветочним богослуженьом у центру городу, резаньом славского колача и приємом у будинку Скупштини општини Вербас.
Нащивителє того дня на площи опрез Храму Вознесения Господнього могли покоштовац сладки и слани лакотки котри були виложени на числених штандох, а котри представяли рижни здруженя гражданох. На єдним зоз штандох були виложени лакотки котри приготовели жени зоз Активу женох КУД Жатва зоз Коцура.
За наймладших були орґанизовани рижни забавни змисти, як друженє зоз численима аниматорами, фотоґрафованє, бависко у забавним дворцу, а було и столїки на котрих предаваче понукали свойо продукти, лакотки, квеце, облєчиво и инше.
Преслава закончена зоз културно-уметнїцку програму котра була отримана на велькей бини опрез храму, а котру пририхтали секциї и фолклорни ансамбли Културного центру Вербасу.
На означованю швета присуствовали предсидатель општини Вербас Милан Ґлушац, заменїк предсидателя општини Вербас Йован Ковачевич, предсидателька Скупштини општини Вербас Тияна Алексич, члени Општинскей ради, одборнїки и вельке число Вербащанох, як и представнїки числених городох и општинох.
Центер Вербасу цали дзень бул полни зоз нащивителями, домашнїма и з околних местох, котри уживали у каждей часци пририхтаней преслави храмового швета и слави городу.
