ВЕРБАС – Вчера вечар у КПД „Карпати” у Вербаше отримана едукация о вишиваню, у рамикох проєкту „Стари ремесла” Покраїнского секретерияту за привреду, обезпечованє роботи и ровноправносц полох, на хтори конкуровало вербаске Дружтво.
Едукацию орґанизовала секция „Карпатох” Форум женох, а о традицийних руских и українских вишивкох бешедовали Ясмина Долапчев, София Мученски, Штефка Барановски и Славка Тамаш.
Основна намира едукациї промововац ручни роботи, окреме вишивки, а нащивителє могли чуц о ручних роботох пред сто роками, та актуалних у нєшкайшим чаше.
Госцох на едукациї привитал предсидатель Дружтва др Деян Загорянски, а после преподаваня нащивителє могли поопатрац виставу.
КПД „Карпати” прейґ того проєкту достало 80 000 динари за купованє проєктору и платна, хтори буду хасновани за едукацию и роботнї.
