НОВИ САД – У Руским културним центру всоботу, 6. юния отримани ювилейни, 25. Фестивал дзецинскей творчосци Руснацох у Войводини – Веселинка.
Манифестация почала зоз промоцию кнїжки Квитки з мамовей заградки Ани-Мариї Рац, рускей учительки у Новим Садзе, а розгварку з дзецми на тему квеце, як и Квиз на видео биму пририхтала редакторка часопису за дзеци Заградка Мая Зазуляк Гарди. Наймладши новосадски дзеци рецитовали писньочки о квецу, а програма предлужена зоз фолклорну роботню – традицийним рисованю по мурох, тиж на тему – квеце.
Ювилейну вечаршу програму отворел предсидатель Националного совиту Руснацох – Стеван Самочета, привитуюци шицких присутних подзековал орґанизатором, руководительом секцийох и учительком на уложеним труду и усиловносци же Веселинка тирва уж штварцину вика. Вон спомнул же РКЦ того року преслави и 80 роки од снованя, и наявел означованє ювилея зоз шветочну академию.
Пред початком програми на Веселинки привитани и предсидатель Вивершного одбору Националного совиту Руснацох Славиша Сабадош, парох новосадски о. Дарко Рац як и Ирина Папуґа спред Дружтва за руски язик литературу и културу.
Од того року фестивал достал и свою гимну з хтору почала програма, а одшпивали ю новосадски дзеци зоз предшколских установох и основних школох хтори пририхтрали наставнїци Оля Яковлєв, Ванеса Медєши и Ана-Мария Рац. Вельку помоц и потримовку мали од музичара Йована Бєлици и директора РКЦ -а Владимира Сивча.
На сцену вишли наймладши Ива Дивлякович, а потим и Лана Маркович и одшпивали по шпиванку, а Надя Чирович, Мелиса Брекайло и Алиона Корпаш ше представели у рецитованю. Шпивали и Инес Вукмирович, Теодора Ковач, Катарина Медєши, браца Андрей и Иван Маґочово, хтори на Веселинки и грали, а шпивачох на сцени провадзел дзецински хор. Писнї рецитовали и Иван Будински и Антония Сабадош, а потим наступели и дзеци зоз других местох. Бикичанє з Културно просвитного дружтва Иван Котляревски одтанцовали два танци, а їх руководителька – Любов Зейкан Бобаль. З Кули и Руского културно уметнїцкого дружтва др Гавриїл Костельник наступели Ивона Йоксович у шпиванки, а Николина Орос у рецитованю, пририхтали их Александар и Еуфемия Планкош. З Вербасу наступела дзивоцка ґрупа, а вец и солистка Михаела Миклош, руководителька – Саня Копривица.
Фолклораше РКЦ-а одтанцовали Козачок, а їх пририхтали Марияна Мункачи-Сивч и Милан Брекайло, док за клавиром була Весна Медєши.
Дзецинска шпивацка ґрупа з Нового Орахова зоз Културно уметнїцкого дружтва Петро Кузмяк на Веселинки и шпивали и грали, а за наступ их порихтал Борис Маґоч. Дзеци з Миклошевцох одшпивали два шпиванки, першу Ребека Красник, а вец и у дуету з Рахелу. Потим одтанцовали Палїчкови танєц, їх руководителька Леся Мудри. Зоз Коцура зоз Културно-уметнїцкого дружтва Жатва танцовала младша фолклорна ґрупа, їх руководителька Александра Горняк, а на бини ше представели и фолклораше КУД Тарас Шевченко зоз Дюрдьова у кореоґрафиї Тропотянка, хтори пририхтала Мария Хромиш. Спред Дома култури Руски Керестур предостатня наступела Дзецинска фолклорна ґрупа у хореорґафиї Дунаю, Дунаю, а руководителька Андрея Штефанко.
На кажду Веселинку приходза и новосадски приятелє, а того року то було СКУД Железничар зоз фолклорним ансамблом Вила. Вони на тогорочней Веселинки остатнї танцовали.
През цаловечаршу програму присутних у публики водзела Ивана Чордаш.
Фестивал Веселинка потримали Министерство за културу Републики Сербиї, Покраїнски секретарият за културу и явне информованє, Город Нови Сад, Национални совит Руснацох и Руски културни центер Нови Сад.
