КУЛА – Новинаре Руского слова, потим як им на прешлей схадзки Скупштини општини Кула нє було дошлєбодзене присуство, за нєшкайшу схадзку нє достали анї материял анї поволанку. Як зме дознали зоз сайту општини Кула, треца схадзка СО Кула будзе отримана нєшка, 9. юния, на 10 годзин, а на дньовим шоре буду вкупно 7 точки.
У плану потвердзиц мандати одборнїком Скупштини општини Кула, потим на шоре предлог Одлуки о анґажованю екстерней ревизиї консолидованого закончуюцого рахунку буджета општини Кула за 2025. рок, предлог Одлуки о вименки и дополнєню Одлуки о финансийней потримовки фамелиї зоз дзецми и злєпшаню условийох за задовольованє основних потребох дзецох при образованю и воспитаню. На дньовим шоре и предлог Одлуки о приношеню вименкох и дополнєньох Плану детальнєй реґулациї центра Кули, предлог Одлуки о вименки Одлуки о формованю Општинского штабу за позарядово ситуациї, як и предлог Рочней програми защити, ушореня и хаснованя польопривредней жеми за подруче општини Кула за 2026. рок, а за конєц, як и звичайно, плановани одборнїцки питаня.
Вимога за акредитованє и присуство новинарох Руского слова на схадзки послата вчера.