РУСКИ КЕРЕСТУР – Вечарша, музична часц програми Екуменского фестивалу духовней музики Емаус фест, хтори отримани всоботу, 13. юния у Марийовим святилїщу Водици, була по традициї предвидзена за концерт духовней музики зоз елементами класичного, традицийного и поп-рок виразу.
Богати репертоар и рижнородни музични жанри того вечара допринєсли окремней атмосфери фестивала, хторому уж штири роки за шором циль промововац духовни вредносци, медзисобне розуменє и културни диялоґ през музику.
Фестивал, зоз пригоднима словами, отворел владика Грекокатолїцкей епархиї святого Миколая Руски Керестур кир Георгий Джуджар, хтори з тей нагоди привитал присутних.
Музичну часц вечара отворела музична ґрупа зоз дзецинскей заградки Цицибан, зоз Руского Керестура у провадзеню своєй воспитачки Татяни Фейди, та наймладши учашнїки вишпивали писню Любов. По конєц музичней програми наступели и: камерни хор Звони зоз Селенчи, потим мац и дзивка – Петронела Феньвеши и Мария Феньвеши Юнґ зоз Кули, Женска шпивацка ґрупа Дома култури зоз Руского Керестура, тиж Керестурец Славко Афич зоз авторску композицию Дзе шпя и бавя ше дзеци, музична ґрупа Будзенє зоз Суботици, хор святого Петра зоз Беоґраду хтори ше представел зоз автентичну африцку духовну музику, потим кантавтор и ґитариста Кристиян Салихович зоз Сараєва, Поп-рок хор зоз Кули, Ансамбл Ирида зоз Сримскей Митровици, як и музични состав Лумен у чиїм составе домашнї, млади волонтере Каритасу.
Помедзи точкох, жири у составе: Чинция Панеро, Корнелия Будински, Дионизий Малацко, Александра Медєши и Валентина Рац, вибрали побиднїцки роботи тогорочного подобового и фото конкурсу, на тему Вибрациї, хтори мал задаток од 66 роботох вибрац даскельо найлєпши.
Так, у катеґориї Дзецинскей заградки наградзени Ґаврило Илич, у катеґориї дзецох од 1. по 4. класу основней школи наградзена Исидора Секулич, потим Клара Блаґоєвич достала награду у катеґориї возросту дзецох од 5. по 8. класу, док у катеґориї найлєпшей фотоґрафиї награду достала Ксения Катрина. На концу преглашена и найлєпша робота за хтору гласала публика, та награда пошла до рукох Мариї Няради.
Уж по традициї, на концу Емаус фесту, шицки учашнїки вєдно на бини виведли духовну шпиванку Вельки ши, а потим, позберани коло велького огня, присутни ше дружели зоз шпиванку и танцом.
През цаловечаршу музичну програму числених присутних того вечара водзели Павлина и Михаїл Римарово, Павлина тиж и директорка Фестивалу, главни координатор Янко Катона, редактор концертней часци фестивалу Александар Планкош, а за успишно орґанизовани фестивал постарали ше и числени млади волонтере Каритасу.
