НОВИ САД – Радио програма по руски РТВ на ултра кратких габох 92, 100 и 107, 1 меґагерци, од пондзелку, 22. юния почнє ше емитовац по лєтней програмскей шеми.
У лєтней програмскей шеми буду одредзени вименки у програмских змистох и тематских емисийох. Векшу часц змистох котри ше слухало у наших окремних емисийох, ше у лєтней шеми инкорпорує до програмских блокох колажного типу. Термини оставаю исти: Ранша програма од 6 до 8 годзин, а од пондзелку до пиятку пририхтує ше прилоги на рижни теми, як и стаємни рубрики и информативни емисиї. Висти ше емитує на пол седмей годзин, а ширшу информативну емисию Ранши дньовнїк на пол осмей. Вшелїяк, музики пошвецена векша часц програми же би лєтни рана починали весело и розбавено.
Пополадньова часц програми на руским язику почина точно на поладнє зоз вистами, потим до 12:30 музика, а од 12:30 до 14 годзин место тематских емисийох, од пондзелку до пиятку будзе ше емитовац емисию Влєце пополадню у котрей буду рижни змисти: пондзелок ше пошвеци спорту и збуваньом по наших местох, вовторок будзе бешеди о польопривреди и живоце на валалє, а годно слухац и гумористичну емисию Емилияда. Стреду буду заступени змисти зоз култури, як и емисия Женоблоґия. Штварток буду теми за дзеци и младих, а пияток, окрем же ше наяви збуваня котри би слухачом могли буц интересантни, будзе слова у вязи зоз фамелию, о старших…
През викенд Ранша програма почнє зоз вистами на 6 годзин. Соботу после вистох и музики будзе ше емитовац емисию Женоблоґия на 6:30, а од 7:00 годзин емисию Горизонти. Нєдзелю после вистох и музики, на пол седмей годно послухац репризно Емисию за дзеци, а од седем Емисию за валал.
Соботова пополадньова програма нє пременєна у одношеню на жимску шему: после поладньових вистох музична емисия Шпиваночки мойо, на 12:30 термин резервовани за Емисию за дзеци, од 13 до 14 годзин Соботово стретнуца. Информативна емисия Радио новини на 14 годзин.
И нєдзельова пополадньова програма без вименкох: висти почню на 12 годзин, потим шлїдзи емисия З народней студзенки, а од 12:30 термин резервовани за Културну панораму. Од 13:30 до 14 годзин емитує ше емисию Вирую. Пополадньови блок ше закончи з централну информативну емисию Радио новини котра почина на 14 годзин.
Програму на руским язику два раз тижньово ше емитує у ноцних терминох и то стреду и нєдзелю. Стреду од 21:30 будзе реприза Емисиї за валал, од 22:30 гумористична емисия Емилияда. Од 23 годзин слухаче знова годни слухац емисию Соботово стретнуца. Од пол ноци до двох рано на програми руска нарона музика, а од двох до пейцох у Ноцним мозаику буду радио драми и знїмки з наших музичних манифестацийох. Од пейцох до шейсцох буду емитовани забавни шпиванки, а потим од 6 почнє порядна Ранша програма.
Нєдзелю ноцна програма почнє на 22:30 з репризу емисиї Вирую, а од 23 годзин до пол ноци реприза Културней панорами. Од пол ноци до двох рано годно послухац руски нарони шпиванки, а од двох до пейцох у Ноцним мозаику буду радио драми и знїмки з наших музичних манифестацийох и фестивалох. Од пейцох до шейсцох будзе забавна музика, а потим на 6 почнє порядна Ранша програма.
И того лєта будзе ше провадзиц шицки значни збуваня, фестивали, манифестациї, будзе ше их знїмац и емитовац одложено же би слухаче були информовани о шицких актуалносцох як у нашей заєднїци, так и о шицким цо коло нас.
