НОВИ КНEЖЕВАЦ – У рамикох проєкту Афирмация мултикултурализма и толеранциї у Войводини, од 1. по 5. юлия, отримани перши Етно-камп под покровительством Покраїнского секретарияту за образованє и Здруженя За лєпши Нови Кнежевац. У кампу участвовали 32 штредньошколци зоз осем войводянских городох и општинох, а медзи хторима були и школяре першей класи Ґимназиї на руским наставним язику, зоз Школи Петро Кузмяк, зоз Руского Керестура.
У провадзеню своїх наставнїкох, школяре на интересантни и нєзвичайни способ упознали културу, традицию, вредносци, народни писнї, фолклор и ґастрономию рижних заєднїцох.
Активносци у Етно-кампу ше одвивали по тимох, та кажди тим представял єдну етнїчну заєднїцу, зоз цильом же би ше розвивало толеранцию и упознало зоз културу других народох. Задаток тимох бул же би на кампу представели и пририхтали змисти вязани за културу, обичаї, народне облєчиво, народни шпиванки, танци и ґастрономию етнїчней заєднїци котру представяли.
Перше место завжала белава екипа чий член була Кристина Сопка, школярка Школи Петро Кузмяк, а менторка екипи була наставнїца социолоґиї, Гелена Пашо Павлович.