КОЦУР – У просторийох Явней библиотеки Данило Киш – Оддзелєнє у Коцуре пияток, 10. юлия, отримана схадзка Управного одбору Рускей матки.
Присутних привитал предсидатель Рускей матки проф. др Михайло Фейса, и представел дньови шор о котрим присутни дискутовали.
Представени звити о участвованю на Биєналу лемковскей култури у Кринїци у Польскей о котрим бешедовали Тат`яна Колєсар и Мирон Джуня, як и звит зоз означованя 35-рочнїци Шветового конґреса Русинох/Руснацох/Лемкох у Медзилаборцох у Словацкей котри представел др Фейса.
На схадзки бешедоване и о реализованю Видавательного плану и предклади за отримованє промоцийох нових виданьох Рускей матки, а визначена и успишна реализация проєкту Интеркултуралносц при Руснацох хтори софинансовало Министерство за людски и меншински права и дружтвени диялоґ зоз трома кнїжками – Єднаки зме (Једнаки смо) Милана Добровольского Ранчера, Дзецинска лиґа (Дечија лига) Милада Обреновича и Дуга над валалом 2 (Дуга над селом 2) главного редактора др Фейси.
Присутним др Фейса представел и план привиту госцох з Мадярскей котрих предводзи проф. др Михаил Капраль, а котри буду у нащиви од 21. по 23. юлий. Тиж, було бешеди и о орґанизованю паломнїцтва до Марияповчу, як и о орґанизованю Стретнуцох младих РРЛ швета у Новим Орахове и Бачкей Тополї котре будзе отримане од 7. по 9. авґуст.
Бешедоване и о отримованю 8. Подобовей колониї Еуфемия Гарди, а дискутоване и о нових руских медийох – Радию Руски Керестур и Руским интернет порталу, и условийох у яких спомнути медиї буду функционовац.
