КОЦУР – У спортскей гали у Основней школи „Братство єдинство” у Коцуре змаганє у столним тенису отримане у рамикох XXXV Спортских бавискох „Яша Баков”, зоз чим всоботу, 11. юлия почал други дзень тогорочней Културней манифестациї „Коцурска жатва” и стретнуце младих.
З тей нагоди ше зишли штири екипи – РКЦ з Нового Саду, КУД „Тарас Шевченко” з Дюрдьова, КПД „Дюра Киш” зоз Шиду и домашнї ФК „Искра” зоз Коцура.
Бавело ше по системи екипно кажде з каждим, а потим и поєдинєчно осемцме бавяче кажде зоз каждим. У екипним змаганю найуспишнєйша була екипа зоз Шиду, потим екипа з Дюрдьова, а вец екипи з Коцура и з Нового Саду. У поєдинєчним змаганю перши бул Реля Радакович зоз Шиду, други Драґан Барна тиж зоз Шиду, а треци Михайло Киш зоз Дюрдьова.
Тогорочне змаганє у орґанизациї потримал Любомир Горняк, Коцурске здруженє младих КУМ, Туристична орґанизация општини Вербас и Национални совит рускей националней меншини.
