Три… два… єден. Шветло на микрофону ше палї. За даскельо секунди учуєце добре познати гласи: Чао, чао, млади…
А пред тим? Шмих, повторйованє тексту, виберанє музики, преверйованє чи знїматель знїма…
Так випатра початок Емисиї за младих, пред тим як цо ше емитує на радио-габох.
Слухаче чую готову емисию. Ми закукли споза сцени. Як настава Емисия за младих, хто стої за микрофоном, а хто за идеями? На тоти питаня нам одвитовали Мирела Тимко и Ванеса Медєши.
Мирела и Ванеса єй авторки уж два, а докмало три сезони. Поробели вельо емисиї, направели прилоги и бешедовали зоз велїма младима – тима хтори активни у секцийох, орґанизовали рижни подїї, посцигли успихи на велїх уровньох… Вони були там, зоз знїмателями, и провадзели шицко тото же бизме то могли и послухац.
Як вони обдумую емисиї, кого знїмаю и чи постої даяки прилог хтори им мили, або го паметаю, а цо учуєме у новей сезони?
Так у МАК-овей рубрики Емисия за младих у тим числу нє будземе читац прилог, алє дознаме од Мирели и Ванеси як вона настава.
Як випатра правенє Емисиї за младих?
Ванеса: Правенє каждей емисиї иншаке и интересантне, алє маме одредзени корпус котрого ше притримуєме.
Перше ше догваряме зоз колеґиню Мирелу же хто нам будзе собешеднїк/собешеднїца у емисиї, потим хто направи розгварку зоз нїм/ню, а вецка ище додаме актуални збуваня, конкурси, концерти, театрални представи, або тото цо у тей хвильки актуалне и так ше намагаме направиц колаж и рижнородносц темох.
Мирела: Так. Пред монтираньом емисиї ше вибера плейлисту же би ше ю присподобело ґу тематики емисиї. Мушим повесц же правиц емисию барз цикаве и гоч маме сценарио за кажду емисию, часто маме спонтани реплики, понеже ше зоз колеґиню Ванесу уж барз добре розумиме и познаме. Подобно роздумуєме и одлично ше дополнюєме.
Як ю обдумуєце, як одлучуєце цо идзе до емисиї, а цо нє?
Мирела: Намагаме ше буц актуални и попровадзиц шицки збуваня при младих, та нам вец дзепоєдни теми приоритет. По тераз нє було дискриминациї и наисце шицко було цикаве цо зме сцигли попровадзиц и подознавац.
Цо сцеце же би млади пренашли, чули у тей емисиї?
Мирела: Вшелїяк же любиме у емисиї правиц розгварки зоз успишнима младима особами, и так и пренєсц идеї младим и мотивовац их кед ше у дачим обаваю, же би були шмели и витворели ше у тим. Нєшка млади барз инспиративни, креативни и иновативни.
Цо думаце же найлєпши бок емисиї, чом би их млади требали слухац?
Ванеса: Найлєпши и найкрасши бок емисиї праве тото же ше намагаме представиц младих хтори успишни у своїх обласцох, же би були мотивация шицким нам.
По чим ше Емисия за младих розликує од других змистох за младих?
Ванеса: Вшелїяк, Емисия за младих ше розликує од других змистох прето же є по руски, а ридко єст таки змисти за младих по руски. Наша емисия наисце рижнородна, актуална и сучасна.
Мирела: Окрем прилогох у хторих млади можу чуц и дознац дацо нове о своїх товаришох, у нашей емисиї вони маю нагоду слухац забавни руски шпиванки хтори, як нам и сами гварели, барз облюбени при наших младих и хтори дзечнє слухаю.
Хтори вам по тераз були найинтересантнєйши, або найемотивнєйши хвильки у правеню емисиї?
Мирела: Кажда розгварка хтору зме потераз зазначели на окремни способ интересантна, та бим нє знала хтору видвоїц.
Думам же нас у каждей емисиї дорушело тото кельо млади полни зоз идеями, жажду за напредованьом и сцелосцу за посцигованьом успихох.
Чи постої прилог хтори на вас охабел окремни упечаток, хтори вам окреме мили и прецо?
Ванеса: Єст вельо прилоги котри охабели упечаток на мнє, алє єден окремни, а то розгварка зоз младима зоз Здруженя гражданох Пакт Рутенорум котри барз мотивовани. Окреме ме позитивно нєсподзивали, бо ше намагаю обдумац змисти и активносци и прицагнуц цо вецей младих.
Мирела: Праве так и я думам. Ище бим можебуц видвоєла и прилоги младих, котри були вязани за студентски протести. Наисце од младих можеме вельо того научиц.
Чи постої собешеднїк, або тема хтора вас нєсподзивала и прецо?
Ванеса: Позитивно ме нєсподзивали млади, бо су елоквентни и нє боя ше виражиц свойо становиска и думаня.
Мирела: Мнє особнє вше нєсподзиваю млади кед бешедуєме о препровадзованю шлєбодного часу. И окреме ме радує же ше дружтвени бависка врацели на вельки дзвери.
Цо думаце же млади нєшка найвецей очекую од медийох?
Ванеса: Вшелїяк же нєшка млади од медийох обчекую обєктивносц информованя, правду, алє и актуални збуваня у нашей заєднїци.
Мирела: Ми ше наисце намагаме буц обєктивни и верим же младих тото прицагує же би слухали нашо емисиї.
Чи маце даяки виволаня кед слово о реализованю Емисиї за младих?
Ванеса: Виволаня єст як и у каждей роботи – часто собешеднїки нє маю часу, случи ше и же нє жадаю участвовац у емисиї, дакеди маме собешеднїкох котри нє таки бешедлїви и вец чежше направиц розгварку. Медзитим, шицко то состойна часц роботи, ми шицких цалком розумиме и нїґда зме ше нє погнївали, прето же кажде ма право и одбиц розгварку.
Цо бисце любели же би слухаче подумали док слухаю емисию, або после нєй?
Мирела: Любела бим най слухаче подумаю же розгварка з нїма була наисце одлична и най пожадаю ознова буц госци у нашей емисиї. ☺ Док монтираме емисию, намагаме ше уклопиц и музику и тему зоз нашим собешеднїком.
Ванеса: Любели бизме най млади уживаю док слухаю нашу Емисию за младих и най нас дзечнє слухаю.
Вшелїяк, любели бизме и кед би ше ґу нам приключели, та, ниа, зоз тей нагоди поволуєме шицких младих же би ше нам явели и були нашо сотруднїки.
Хтори теми бисце любели обрабяц у будучносци?
Мирела: Постоя барз вельо теми о котрих зме роздумовали же би требали буц часц нашей емисиї, алє єдна з темох буду домашнї и странски музични виводзаче и рижни музични напрями котри дараз були барз актуални, алє и тераз су популарни.
Ванеса: У новей сезони будзе слова и о астролоґиї, та нас любителє можу порядно провадзиц и чуц дацо нове, цо можебуц по тераз нє мали нагоду чуц.
А ти?
Цо биш любел/любела чуц у Емисиї за младих?
Пиш Мирели и Ванеси свойо предкладаня, можебуц праве твоя тема будзе часц новей сезони.