КОЦУР – У Основней школи „Братство єдинство” у Коцуре вовторок, 1. септембра, отримани привит першокласнїкох котри того дня по першираз вошли до учальньох як школяре. Першого дня септембра настава у коцурскей Основней школи почала и за шицких других школярох нїзших и висших класох.
Святочни привит будуцих школярох и того року отримани у физкултурней сали. За тоту нагоду їх товарише котри закончели штварти класу з учительками пририхтали програму у котрей малим першокласнїком з рецитациями, шпиванку и танцом прикрашели перши дзень у школи.
Директорка Школи Сенка Мученски шицких першокласнїкох привитала и пожадала им вельо успиху у будуцим школованю, а присутни були и предсидатель општини Вербас Милан Ґлушац и заменїк предсидателя општини Вербас Йован Ковачевич.
После першого преволованя школярох, першокласнїки вєдно зоз своїма родичами и учительками поуходзели до своїх учальньох. До першей класи у коцурскей Школи того року уписани 48 школяре – пецеро школяре до руского оддзелєня и 43 до двох сербских оддзелєньох.
Локална самоуправа традицийно обезпечела безплатни учебнїки за шицких будуцих школярох першей класи, а достали и дарунки од Школи и подприємствох „Бамби”, „Универекспорт” и Специялизованей вистави Експо.
Школярох першей класи руского оддзелєня шлїдуюци штири роки будзе водзиц учителька Валерия Папуґа, а други два оддзелєня котри провадза наставу на сербским язику буду водзиц учительки Єлена Русковски и Ана Ивич.
