РУСКИ КЕРЕСТУР – До нового школского року, у Основней школи „Петро Кузмякˮ у Руским Керестуре, уписани 45 школяре, а вчера, 1. септембра, на шветочним приєму, будуци першокласнїки розпоредзени до трох оддзелєньох.
На шветочним приєму, школярох и їх родичох, привитала директорка школи, Наталия Будински, хтора им пожадала успишни початок нового поглавля, а потим ше учителє поєдинєчно представяли.
Потим ушлїдзел момент хтори дзеци, алє и їх родичи, нєсцерпезлїво чекали – преволованє школярох хтори од тей хвильки буду часц їх оддзелєня.
Так, учителька Мария Колошняї достала Ia класу, учитель Марко Новакович Iб класу, а учителька Лидия Милеуснич Iв класу.
Кед розпоредзованє закончене, кажда ґрупа школярох рушела зоз своїм учительом односно учительку и педаґоґу, до учальнї, дзе першокласнїком подзелєни пакецики зоз лакотками и школским прибором од фондациї подприємства „Универекспортˮ, а шлїдуюцого дня, односно нєшка, достаню и безплатни учебнїки як и школски прибор, хтори обезпечела локална самоуправа Општини Кула.
