НОВИ САД – У городзе, нєдалєко од стреднєй Електротехнїчней школи Михайло Пупин Михайло Сивч и Стоян Mихольчич отворели пицерию „Порок”.
Нове ошвиженє на локалним погосцительним понукнуцу и пицерия Порок, хтора конципована зоз идею злучованя традицийних кухарских методох и сучасного погосцительного приступу. По словох сновательох тей пицериї, фокус дїлованя им окремни рецепти и окреме вибрани состойки же би ше понукло препознатлїви и автентични квалитет.
Власнїки новей пицериї Михайло Сивч и Стоян Mихольчич маю вецей роки искуства за собу як кухаре у рижних популарних ресторанох у городзе и прето ше и одлучели сами дацо отвориц. Перши пици з пеца понукли своїм найблїзшим приятельом и фамелиї, хтори 7. септембра пришли потримац їх иновативну идею.
Фокус у роботи им на випоручованю, а на локалу єст и облачок, та годно и так випоручиц наручени пици. Понукаю вецей файти пици, а млади кухаре Михайло и Стоян гваря же жадаю правиц новосадску пицу хтора будзе смачна, интересантна и хтора ше будзе пачиц шицким. У понукнуцу им за тераз и звичайни пици, алє и новотни зоз заходним уплївом, як наприклад „веґепорок”, лєбо пица зоз печеним месом и тайландскима присмачками, алє и мацерова пица, лєбо як ю вони наволали „кевина пица” зоз грубшим цестом и шицким цо ше найдзе у фрижидеру.
