НОВИ САД – Часопис за дзеци Заградка нарок преслави 80. родзени дзень и з тей нагоди глєда Заградков лоґо, односно защитни знак.
Конкурс отворени за шицки дзеци основношколского возросту по 31. октобер, а задаток дзецка на паперу нарисовац мали лоґо зоз фломастерами, древковима, маснима печацами лєбо даякима другима фарбами, а хто зна, може и диґитално. На лоґу муши писац Заградка и число 80. Треба же би мал и даяки елементи хтори здогадую на дзецински часопис.
Готови рисунок потим треба добре висликовац, лєбо скенирац и послац на имейл zahradkacasopis@gmail.com, лєбо сам папер по пошти на адресу: Новинско-видавательна установа „Руске слово”, Футожска 2/III, 21000 Нови Сад. Зоз рисунком треба послац и авторово мено, презвиско, класу, место биваня и контакт телефон.
Док ше конкурс закончи, комисия вибере найлєпши лоґо. Роботу хтора будзе вибрана преруци ше до диґиталней форми и технїчно ше ю прилагодзи. Лоґо з нагоди 80-рочнїци будзе обявйовани у Заградки у 2027. року и индзей, по потреби, а побиднїк, лєбо побиднїца достанє награду.