КОЦУР – После длугей и чежкей хороти внєдзелю, 20. септембра, упокоєла ше учителька Славица Чельовски зоз Коцура.
Славица народзена 1. мая 1974. року у Вербаше, а як професорка класней настави робела у руских оддзелєньох у Основней школи Братство єдинство у Коцуре. Дипломовала на Учительским факултету у Зомборе, а мастерски академски студиї закончела на Филозофским факултету у Новим Садзе.
Окрем успишней роботи у своїм фаху и роботи зоз дзецми, зазначела успихи и на других польох. Була коавтор вецей кнїжкох – Анґлийско-руского словнїка, науковей моноґрафиї Интеркултурална димензия у образовней вертикали на руским язику и моноґрафиї Руски язик и ИСО-код.
Як припознанє за єй закладаня Славици було здобуце и медзинародного алфанумеричного ОРКИД-коду хтори єдинствено идентификує автора науковей публикациї на шветовим уровню. Окрем того, наградзена була у ревизиї образовних софтверох у рамикох проєкта Днї информатики у школох Войводини.
Славица написала вельочислени рецензиї, була лектор и коректор велїх кнїжкох, а участвовала и у вреднованю образовних материялох и стандардох.
През цали єй роботни вик, Славицово школяре посциговали замерковани резултати на змаганьох зоз рецитованя и литературного виразу, облапяюци општински, покраїнски и републични смотри.
Славица писала поезию як форму свойого особного виразу, та єй твори мож пречитац у вецей збиркох.
Жила, робела и творела у Коцуре, дзе будзе и похована на пондзелок, 21. септембра на 12 годзин на римокатолїцким теметове.