СУБОТИЦА – Внєдзелю, 25. октобра, на швето Христа Царя у нашей грекокатолїцкей парохиї у Суботици бул преславени Кирбай.
Службу Божу у Францисканскей церкви у Каплїчки чарней Мариї на 16:30 годзин служел преосвящени владика кир Георгий Джуджар зоз о. Владиславом Варґом, о. Иваном Дацешеном и домашнїм священїком о. Данилом Задрепком. Апостол читала ш. Авґустина Илюк зоз Руского Керестура.
Вирних було досц, окреме домашнїх. Преосвящени владика кир Георгий у казанї визначел же швето Христа Царя значне у нашим християнским живоце през хторе можеме роздумовац о одношеню ґу Богу и ближнїм. И меняц живот. На концу служби домашнї священїк о. Данил Задрепко подзековал владикови Георгийови же увелїчал Кирбай и помировал присутних.
После Служби Божей у каплїчки Францисканского манастира була закуска и друженє хторе порихтали члени Дружтва Руснацох у Суботици хтори прешлого викенду преславели 25 роки роботи.
