НОВИ САД – На Радио програми по руски нєшка на 12:30 годзин, будзе емисия Дом и фамелия, а на 21:30 годзин Емисия за младих.
У емисиї Дом и фамелия годно послухац розгварки на рижни теми. Закончує ше октобер, мешац котри пошвецени старшим особом. Старши особи часто наиходза на дискриминацию и нєпорозуменє у дружтве, аж и од блїзких особох. Вельки проблем старших особох осаменосц, бо часто жию сами. Прето ше парохиялни Каритаси у Руским Керестуре и Коцуре трудза зоз своїма активносцами помогнуц старшим особом. У Коцуре од 1. новембра почнє гуманитарна акция Дунц шпайз. Нєшка барз популарни електронски циґаретли и ткв. вейпи котри школяре висших класох нєконтроловано хасную. О тим яки вони чкодлїви и цо приноши хаснованє истих мало ше зна, алє фаховци спозорюю же су за школярох анї кус нє безпечни. Редакторкa емисиї Саня Маркович.
Емисию Дом и фамелия мож послухац кажду стреду на 12:30 годзин на УКТ габох радия РТВ на 92, 100 и 107,1 мгг. Реприза емисиї на соботу на 7 годзин, а мож ю послухац и на одложеним слуханю на сайту Радио-телевизиї Войводини.
У Емисиї за младих, нєшка на 21:30 годзин, годно послухац интересантни прилоги. Основна и штредня школа Петро Кузмяк зоз Руского Керестура и того школского року предлужела сотруднїцтво зоз Интеркултуралну школу зоз Швайцарскей у рамикох Еразмус плус проєкту. Годно послухац и розгварку зоз младу уметнїцу Валентину Рац зоз Руского Керестура хтора 17. октобра мала заєднїцку виставу малюнкох у Сава центру у Беоґрадзе. Слова будзе о актуалних стипендийох и конкурсох за младих. Понеже за викенд будзе такволана Ноц босоркох, годно дознац интересантни информациї о тим дню.
Емисия ше емитує премиєрно каждей стреди од 21:30 годзин и репризно штварток од 12:30 годзин на габох РНС. Редакторки и водительки емисиї Ванеса Медєши и Мирела Тимко.
Емисия за младих ше емитує премиєрно каждей стреди на УКТ габох радия РТВ на 92, 100 и 107,1 мгг, на 21:30 годзин и репризно штварток на 12:30 годзин, а мож ю послухац и на одложеним слуханю на сайту РТВ. Редакторки и водительки емисиї Ванеса Медєши и Мирела Тимко.
