КУЛА – Министерка польопривреди и защити животного штредку у Влади Републики Сербиї Снежана Боґосавлєвич-Бошкович вчера нащивела закончуюци роботи на Главним колектору за општини Кула и Вербас, а потим отримала и схадзку з чолнїками двох општинох.
Министерство польопривреди и защити животного штредку прешлого тижня обезпечело 21 милион динари за пияту, закончуюцу фазу вибудови Главного колектору Кула-Вербас, а спрам контракту хтори подписало, роботи муша буц закончени у юнию.
По законченю Главного колектору одрутних водох, кулску канализийну мрежу годно прикючиц на тот колектор, та далєй до Централного пречисцовача одрутних водох, хтори будзе у Вербаше.
До того проєкту Министерство польопривреди и защити животного штредку дотераз уложело 106 милиони динари, а до траси Главного колектору уложени и средства з Норвежскей, та з фондох Европскей униї.
Наявене же идуцого року буду цалком закончена канализациї у Кули и Червинки и же з тим будзе ришени длугорочни проблем заґадзеного беґелю у Кули.
