Бачка ище вше на пиятим месце

автор Л. Вереш
336 Опатрене

ДЮРДЬОВ – У 26. колу Подручней фодбалскей лиґи Нови Сад, хторе одбавене 21. мая, фодбалере ФК Бачка 1923 зоз Дюрдьова страцели у стретнуцу зоз фодбалерами ТСК зоз резултатом 1:2.

Бавело ше углавном на Бачковей часци терена. Було даскельо добри нагоди за ґол, алє Лишич бул сконцентровани и нє допущел же би лабда затресла ґол Дюрдьовчаном. У остатнїх минутох першого полчасу домашнїм ше удало бависко преруциц на другу часц терену. У 45. минути Дюрдьовчанє виводза корнер и Милан Роґич схопно копа до лабди хтора закончела у ґолу.

У другим полчаше бавело ше на шицких часцох терена. Домашнїм ше указала добра нагода за побиду у 69. минути, понеже єден бавяч зоз госцуюцей екипи виключени зоз бависка. Алє анї зоз бавячом вецей нє поспишело им ше победзиц другопласовану екипу. У 78. минути фодбалере ТСК виєдначую резултат, а нєодлуга, у 87. минути посцигую ище єден ґол.

Вельке число жовтих картонох на стретнуцу, три за домашнїх, шейсц за фодбалерох ТСК, два опомнуца за делеґацию ТСК и єден червени картон за ТСК указую же на терену вообще нє було спортского справованя. Тиж так, и навияче обидвох екипох указали минимум спортского справованя.

После того кола Бачка ище вше на пиятим месце на таблїчки зоз штерацец штири боди. У шлидуюцим колу дюрдьовски фодбалере ше стретню зоз фодбалерами Фрушкогорца у Сримскей Каменїци.

ПОВЯЗАНИ ТЕКСТИ