Баражни стретнуца за Сербску лиґу: ОФК „Вербас” у висшим ранґу

автор А. Паланчанин
144 Опатрене

Кед слово о фодбалу, Oпштина Вербас ше ма зоз чим похвалїц.
Насампредз, коцурска Искра ше виборела за пласман до висшого ранґу змаганя – до Войводянскей лиґи,
а ОФК „Вербас” ище висше – до Сербскей лиґи Войводини

У новей першенственей фодбалскей сезони 2024/25 у висшим ранґу будзе ше змагац и ОФК „Вербас”. Добри резултати хтори екипа зазначела у прешлей сезони и успих у баражних стретнуцох, нагадую же од початку новей, Вербащанє буду мац нагоду уживац у добрих бавискох екипи зоз Шлайзу.

Потерашнє дружтво Вербащаньох зоз Войводянскей лиґи ґрупа Сивер, екипа ОФК ,,Вербас” „преросла” после одбавених двох стретнуцох процив екипи ФК „Єдинство” зоз Руменки. Вербас зоз двох стретнуцох у вкупним резултату вишол як побиднїк – у першим стретнуцу у Руменки бавел нєришено, та резултат бул 1:1, а у другим, реванш стретнуцу, на своїм терену победзел зоз резултатом 2:0.

Зоз тим триюмфом екипа Вербасу ше врацела, после скоро двацец рокох, до трецого ранґу змаганя.

У составе ОФК „Вербас” бавели: Дамянович, Миличкович, Дюркович (Тепавчевич), Щепанович, Вуйошевич, Васич (Дракуловоч), Живкуцин, Баїч, Мичунович (Хрнячки), Краинович, Клисарич.

У першим полчасу нє було ґоли, алє прето борба на терену була оштра, та судия подзелєл три жовти картони, од хторих два достали Вербащанє.

На перши ґол ше чекало аж по 69. минуту бависка, кед Краинович звладал ґолмана Єдинства. Публика на стадиону була порихтана за побиду, хтору потвердзел Клисарич у 94. минути  – ОФК „Вербас” – ФК „Єдинство” 2:0.

После стретнуца тренер ОФК „Вербас”, Драґан Тепавчевич, надпомнул же тото стретнуце зоз екипу Єдинства зоз Руменки було чежке, насампредз, прето же то квалитетна екипа.

– Од початку наша тактика була препущиц инциятиву процивнїкови. Чекали зме же бизме могли правиц нагоди зоз контри, полуконтри и нєсподзивали одбрану и ґолмана госцох. Важне надпомнуц же наша екипа млада и нє барз искусна. Було тоти два нагоди, хтори зме вихасновали. Но, и госци мали нагоди, алє нє мали щесца, и схопно зме одбранєли наш ґол. Вшелїяк, ище раз мушим надпомнуц же екипа ФК „Єдинства” одлична, квалитетна, хтору водзи добри тренер и Управа клуба. Наздавам ше же од идуцей сезони, о рок, ознова ,,найду” свойо место у тим дружтве – гварел тренер ОФК „Вербас”, Драґан Тепавчевич.

Од єшенї Вербащанє буду бавиц процив екипох ҐФК „Словен” зоз Руми, ФК „Раднички” зоз Зренянину, ФК „Динамо 1945” зоз Панчева, ОФК „Кикинда” зоз Кикинди и другима. Будзе вельо спокуси, алє наздаваме ше же буду добри и успихи. 

ПОВЯЗАНИ ТЕКСТИ