КОЦУР – У церковней сали Грекокатолїцкей церкви Успения Пресвятей Богородици у Коцуре внєдзелю дополадня, 22. децембра, отримани Каритасов крачунски вашар.
Тот Крачунски вашар и того року бул нагода же би нащивителє поопатрали и купели рижни ручни роботи и прикраски за наиходзаци крачунски и новорочни швета. Окрем тих, як и других понукнуцох котри викладаче порихтали, могло купиц домашнї колачи и резанки, алє и ґаґорки, як и бобальки котри порихтали волонтере коцурского Каритасу.
На Крачунским вашаре ше и того року представели числени викладаче зоз валалу, алє присутни були и викладаче зоз других околних местох. Так могло купиц найновши виданя НВУ „Руске слово” по знїженей цени вочи наиходзацих шветох, а и наймладши зоз „Малей роботнї” представели свойо твори котри вредно правели на отриманих роботньох у Каритасових просторийох.
Понукнуце було рижнородне, богате, за шицки смаки и каждого могло найсц по дацо, та мож заключиц же Каритасов крачунски вашар бул окреме успишни.
