КОЦУР – Добродзечне огньогасне дружтво Коцур всоботу, 11. фебруара орґанизовало традицийни Огньогасни бал котри бул отримани у Пелетовей сали.
Вельке число госцох було зоз Коцура, алє и зоз других околних местох. Тиж, и члени числених валалских здруженьох и Културно-уметнїцких дружтвох пришли ше розвешелїц того вечара.
На початку, представнїки Добродзечного огньогасного дружтва привитали шицких госцох. З тей нагоди, додзелєне и окремне припознанє и дарунок найстаршей членїци Дружтва Меланиї Живанович.
Орґанизаторе за тот вечар, окрем смачней вечери, пририхтали и богату томболу, а вредни и интересантни дарунки даровали и числени спонзоре. Перши три награди – фурик, бициґлу и сучасни телевизор, обезпечело коцурске Огньогасне дружтво. Найщешлївши пошли дому з рижнима дарунками, а першу награду достали госци зоз Коцура.
За добре розположенє шицких присутних задлужени були „Коцурски бетяре”, а весела атмосфера, провадзена зоз шпиванку и танцом, тирвала до позних годзинох.
