КРУЩИЧ – Фодбалски клуб Русин внєдзелю, 18. фебруара одбавел ище єдно пририхтуюце стретнуце, а госцовали у сушедним месце дзе бавели зоз екипу Младосц зоз Крущичу.
По красней хвилї, на стадиону у Крущичу моци одмерали два екипи котри ше уж роками познаю, дакеди ше стретали и у першенствених стретнуцох, медзитим остатнї роки нє бавя на истим уровню, та бавя лєм пририхтуюци стретнуца.
Екипа Русина добре рушела, мала инициятиву, та так после твардого бависка на штред терена, направене контра нападнуце екипи Младосци и на добре додаванє зоз штредку терена центерфор домашнїх зоз шлїзканя дава ґол за 1:0.
Русиново бавяче ше дакус таргли после достатого ґолу и почали правиц нагоди и баржей грожиц на ґол Младосци.
После даскелїх нагодох, млади Саянкович дал и ґол, медзитим понїщени є пре офсайд у котрим ше нашол. Зоз таким резултатом ше пошло на полчас.
У другим полчасу, направени даскельо нагоди на обидвох бокох, медзитим резултат остал исти, док зоз єдней соло акциї Будинского, котри зоз верху шеснац метерох моцно копа лабду на ґол, домашнї ґолман ю одбил, алє наиходзи млади Александар Тома и змесцує ю до мрежи за резултат 1:1.
Русиново бавяче после того ґолу правя ище даскельо добри нагоди, а после красней акциї Будински трафя до стативи. Щесце нє провадзело Русиновцох, лабда нє сцела войсц до ґолу.
Нє одлуга потим, после соло акциї домашнього бавяча, направени фаул у каребним просторе и досудзени пенал за екипу Младосци, так домашнї звекшали рзултат на 2:1.
Пред конєц стретнуца найлєпшу нагоду же би ше резултат вировнало мал Йованович, котри на одличне центербице, зоз трох метерох, преруцел лабду прейґ греди котра закончела у ґол ауту.
До конца стретнуца шицки бавяче Русина достали нагоду бавиц, направени ище даскельо нагоди, медзитим нє удало ше им дац ище даєден ґол. Резултат од 2:1 бул и конєчни резултат на тим стретнуцу.
За Русин наступели – Михайло Надь, Иван Чапко, Стефан Тома, Иґор Грнчяр, Александар Кочиш, Деян Павлович, Лука Иличич, Матей Саянкович, Деян Чернок, Стефан Мароєвич, Дарко Сушич. Єдини ґол за Русин дал Александар Тома.
Идуце пририхтуюце стретнуце будзе и прави тест за Русиновцох, заказане на нєдзелю, 25. фебруара, кед на керестурски Яраш приходзи екипа Искри зоз Коцура.
