КОЦУР – У Доме култури у Коцуре, Здруженє гражданох „Дунайска соната” зоз Нового Саду отримало концерт класичней музики у рамикох проєкту „Зарна”. Циль проєкту приблїжиц публики класичну музику през концерти котри вони тримую по войводянских валалох.
На концерту наступели: на клавиру Йожеф Ритер, на виолини Андрияна Раїч и Саня Видакович, сопран Оливера Болта, а на репертоару им композициї Баха, Моцарта, Шостаковича, познати гити класичней музики.
Шлїдуюци концерт „Дунайска соната” заказала 20. септембра у Ловченцу у Доме култури на 18 годзин и 26. септембра у ОШ „Браца Новаков” у Силбашу на 18 годзин.
Здруженє гражданох „Дунайска соната” основане 2015. року. Идея котра их злучує то же класична музика за каждого и може буц часц каждодньовосци.
Тото уж треца концертна турнея „Зарна”, а уметнїки наступели у дзешец валалох, а проєкт финансує Покраїнски секретарият за културу, явне информованє и одношеня з вирскима заєднїцами.