РУСКИ КЕРЕСТУР – После приятельского стретнуца процив Вербащаньох, когуцики и пионире Фодбалского клубу „Русинˮ того викенду, пияток 27. януара, угосцели сушедну екипу з Крущичу, процив хторей у Спортскей гали у двох змаганьох однєсли побиду, док у двох були поражени.
У першим стретнуцу наступели наймладши, дзеци 1. и 2. класи хтори од Крущичаньох страцели зоз малу розлику од 2:3, а наступели у составе – Давид Еделински, Тони Сивч, Лука Зелич, Андрей Надь, Филип Бурчан, Страхиня Кршич, Михайло Шомодї, Стефан Такач, Дориян Попович, Лука Тасич.
Млади фодбалере возросту 3. класи, и того викенду ознова зазначели побиду зоз резултатом 5:0, а побиднїцки тим творели – Давид Колошняї, Тони Надь, Даниєл Фейди, Иван Надь, Кристофер Дудаш, Йован Бошкович и Давид Гарди.
Шлїдуюци наступели дзеци 4. класи, хтори страцели з резултатом 7:3, а наступели у составе – Андрей Виславски, Алексей Виславски, Ален Бики, Николина Гарди, Ерик Русковски. Понеже им хибели троме бавяче були помоцнєни и зоз хлапцами зоз 6. класи – Тадей Виславски, Патрик Варґа и Исак Новта.
На концу наступела 5. и 6. класа вєдно, у составе – Алекс Цвайґ, Никола Планчак, Єлисей Пап, Марко Драґутинович, Тони Орос, Лука Стойков и Тадей Виславски. Русиновци у тим составу зазначели побиду зоз 5:0 процив екипи Младосц.
На стретнуцу зоз Русинового Фодбалского клубу, як тренере або судийове були – Зденко Шомодї, Деян Йолич, Тихомир Медич и Сани Колошняї, а Спортску галу и з тей нагоди добре порихтал єй управнїк Драґан Ковачевич.
