КОЦУР – Члени коцурского Мото-клубу „Пеґасус”, у сотруднїцтве зоз Туристичну орґанизацию општини Вербас орґанизовали интересантну подїю у центру Коцура под назву „Мото Дїдомразияда”.
На площи опрез Дома култури внєдзелю, 22. децембра отримане друженє зоз моторкашами пооблєканима до Дїдох Мразох котри наймладшим з нагоди наиходзацих новорочних и крачунских шветох дзелєли лакотки. И за старших нащивительох було порихтане ошвиженє, цепли чай и варене вино, а цале друженє було прикрашене зоз музику.
Богати етно столи вредних членїцох коцурских здруженьох Активу женох КУД „Жатва” и КУД „Завичайне врело” зоз рижнима найсмачнєйшима колачами, сланима питами и сладкима рейтешами нє заобишли анї тоту подїю, а члени Ловарского дружтва „Сокол” за нащивительох порихтали швиже упечени колбаси зоз дзивинового меса.
У центру Коцура були поставени и даскельо столїки дзе викладаче представели свойо понукнуца, домашню палєнку рижних смакох, домашнього пива, колачи, резанки и бобальки, рижни прикраски, а ту бул и пастор Евангелскей церкви Александар Суботин котри тиж порихтал нащивительом дарунки.
Моторкаше у червених шапочкох наймладшим подзелєли дари, а дзецински нашмеяни твари виполнєли валалски улїчки того дня.
Орґанизаторе и того року були окреме задовольни зоз одволаньом нащивительох. У орґанизациї цалей подїї участвовали и помогли, окрем членох МК „Пеґасус”, Туристична орґанизация општини Вербас, Општина Вербас, Месна заєднїца Коцур, Основна школа „Братство єдинство”, Етно клуб „Одняте од забуца”, КУД „Жатва” и КУД „Завичайне врело”, Дом култури, Ловарске дружтво „Сокол” и пастор Евангелскей церкви Александар Суботин.