Интересантни провадзаци програми на „Коцурскей жатви”

автор Ол. Русковски
161 Опатрене

КОЦУР – У вечарших годзинох пияток, 19. юлия у просторийох Етно клуба „Одняте од забуца” у Коцуре отримани провадзаци програми першого дня традицийней културней манифестациї 44. „Коцурска жатва”.

Перша часц вечара почала зоз виставу „100 роки радия” котру отворела предсидателька Етно клубу Аранка Медєши. Присутним Медєшова бешедовала о историї и зазначених податкох о наставаню радия и розвиваню през прешлосц, о велїх анеґдотох вязаних за апарат котри на рижни способи повязовал и зблїжовал наших старих, а шицки могли видзиц и 10 найстарши радия котри виложени у Етно клубу. У опатраню, и присутни ше уключели до дискусиї и виприповедали даяки свойо здогадованя и интересантносци котри паметаю вязани за радио.

Тот проєкт реализовал Етно клуб у сотруднїцтве зоз Заводом за културу войводянских Руснацох.

У предлуженю першого дня „Коцурскей жатви”, у рамикох проєкту „Одчитованє” отримана розгварка зоз Єлену Дудаш чия вистава нєдавно отворена у Етно клубу, а слики ище вше виложени.

Марина Тодич водзела розгварку у приємним амбиєнту на дворе у Етно клубу, а з тей нагоди Єлена виприповедала о своїх початкох и искуствох вязаних за уметносц, гварела вецей о своєй вистави, а зоз Тодичову предискутовали и о положеню уметнїкох у рускей заєднїци, чи и на яки способи наша заєднїца потримує аматерох, чи вони медзисобно повязани, и о иншим.

Єлена присутним бешедовала и о тим як почала мальовац, о колонийох на котрих участвовала, о аматеризму и иншим, а нащивителє уживали у бешеди о уметносци, як и у Єленових сликох.

Проєкт „Одчитованє” тиж потримал Завод за културу войводянских Руснацох.

ПОВЯЗАНИ ТЕКСТИ