КОЦУР – У церковней сали грекокатолїцкей церкви Успения Пресвятей Богородици у Коцуре вчера, 19. децембра, на швето святого Миколая отримани тогорочни Каритасов Крачунски вашар.
Коцурски парохиянє котри того дня нащивели просториї церковней сали мали нагоду видзиц рижни ручни роботи, икебани и венчики, прикраски за наиходзаци новорочни и крачунски швета. На Крачунским вашаре ше и того року представели числени викладаче зоз валалу.
Нащивителє, окрем рижних прикраскох, могли купиц и домашнї бобальки и ґаґорки, колачи и резанки, алє и други домашнї продукти, шицко цо потребне у каждим доме же би домашнї збогацели днї шветох.
И того року орґанизатор Крачунского вашару бул парохиялни Каритас „Марийов дом” зоз Коцура, а у орґанизациї, окрем його координатора Янка Салонтая, участвовали и шицки Каритасово волонтере.
Того дня грекокатолїцка парохия означовала и швето святого оца Миколая и у шицких Службох Божих парохиянє ше могли помировац.
