ВЕРБАС – У грекокатолїцкей парохиї Святого Владимира у Новим Вербаше внєдзелю, 15. януара, госцовал хор КПД „Карпати” з Вербасу. За вирних нововербаскей парохиї хористи и оркестер пририхтали даскельо крачунски шпиванки и так прикрашели тот дзень.
Вельку Службу Божу, на котрей присуствовало вельке число парохиянох, служел парох нововербаски о. Данил Задрепко. У казанї надпомнул шицким парохияном же кед жадаме провадзиц крочаї Исуса Христа, теди шицко можлїве и нїч у живоце нє нєреалне. Спашенє почина на тим швеце, визначел о. Задрепко, и кед будземе провадзиц Христову идею, идею мира и любови, шицки будземе спашени.
Богослуженє у нововербаскей парохиї того дня, нєдзелю пред Богоявлєньом, зоз шпивом возвелїчал вербаски хор зоз провадзеньом гудацох. Прекрасни коляди одгуковали у цалей церкви, а присутни вирни ше зоз радосцу придружели колядованю.
