БУДВА – Аматере Дому култури Руски Керестур од 25. до 30. авґуста пребували на Интернационалним фестивалу фолклору у Будви у Чарней Гори.
У двох наступох зоз єдну хореоґрафию, наступела Виводзацка фолклорна ґрупа, Оркестер „Юлиян Рамач Чамо” зоз венчиком инструменталник композицийох, а шпивала Дзивоцка ґрупа и солиста Марко Колошняї.
Путованє водзела хореоґрафка и фахова руководителька Андрея Штефанко, вона и пририхтала Виводзацку ґрупу, а Оркестер предводзел Стефан Колошняї.
Попри керестурского ансамблу на Фестивалу наступели ище по два ансамбли зоз Словацкей и Болгарскей, и по єден зоз Литваниї, Босни и Герцеґовини т.є. зоз Републики Сербскей, а зоз Сербиї и КУД зоз Мрчаєвцох.
Турнея до Будви була награда аматером за їх цалорочну роботу, гоч мушели нєдраго плациц змесценє и костиранє, а драгу финансовал Дом култури.
Путованє витворене прейґ аґенциї т.є. Фолклорней асоцияциї зоз Скопя у Сиверней Македониї, котра керестурских аматерох уж поволала и на шлїдуюце госцованє.
