Децембер то мешац кед уж шицки помали починаме роздумовац о крачунских и новорочних шветох. Док єдни украшую обисца зоз лампочками, оквицую ядловци, купую дарунки, планую цо буду робиц у шлїдуюцим року, други роздумую о тим як зазначиц тоти чаривни хвильки
Єден з нїх и Борис Ничич, фотоґраф, родом зоз Кули, алє уж седми рок Керестурец. За ньго жимски швета час кед обдумує сценоґрафию за сликованє у своїм фото студию „Саняˮ у Кули, а уж даскельо роки и у своїм обисцу на Новим населєню, дзе жиє зоз дзивочку Констансу и супругу, по хторей студио и достал мено.
За Бориса, фотоґрафованє през жимски швета нє лєм технїчна схопносц, алє и емоционални вираз. Кажда фотоґрафия приповедка о любови, традициї, фамелиї або приятельстве. На фотоґрафийох крашнє попаковани дарунки, оквицени ядловци зоз осторожно вибраним декором, дзецински бависка, шнїг и пахульки. Борис кадрує, вирабя, та така фотоґрафия постава найвреднєйша памятка и дарунок.
Фамелийна традиция
– Мой дїдо, хтори бул фотоґраф, мал у свой час роботню у Беоґрадзе. Мой оцец и бачи ше тиж занїмали з фотоґрафованьом. Я, ниа, предлужел тоту традицию, лєм же я найозбильнєйше вошол до того, понеже мам и свой студио и остатнї 16 роки жиєм лєм з фотоґрафованя – приповеда вон.
Борис ше зоз фотоґрафованьом занїма вецей як 20 роки. Почал на 18 кед пришол з войска, а перши 9 роки робел без свойого локалу.
– Єден час сом робел дацо инше, а лєм през викенди сом знїмал и фотоґрафовал. Остатнї 16 роки лєм тото робим и з того жиєм. Нє бул то лєгки процес. Требало вельо часу же би ше шицко розвило, а тиж требало и досц уложиц. Моя опрема, лєм цо ше ошвиценя дотика, кошта коло 2.000 евра. У роботнї у Кули мам два просториї за фотоґрафованє и обидва опремени. Треба барз вельо укладац до апаратох. Шицко ше то и троши, та треба вше дацо нове и докупйовац – толкує Борис, визначуюци же ше зоз фотоґрафованьом нє лєгко зарабя за хлєб, як ше дакому видзи.
Вельо ше уклада до опреми за сценоґрафию
Пред коло 10 роками, як нас здогадує Борис, популарни були єдноставни рами за календари зоз новорочнима мотивами, на хторих би звичайно бул портрет дзецох як дарунок родичом, або найблїзшей родзини. Тераз ше вельо вецей обчекує од фотоґрафох. Велї студия тераз уж маю сценоґрафиї як зоз найкрасших голивудских крачунских филмох, ядловци оквицени зоз наймодернєйшима прикрасками, а шицко фарбово усоглашене по найменши деталь.
– Кажди рок ше коло 100 фамелиї приду до нас сликовац лєм коло Крачуна. Углавним, дас два тижнї пред Крачуном и тидзень после у нас барз велька гужва. Маме дома єдну сценоґрафию, а у Кули у студию ище три розлични поставки, у двох просторийох. У єдней просториї ше заменї лєм позадину, а у другей направене дацо таке як дньова хижа у ретро стилу. Єст вецей вариянти, та кому цо одвитує, може виберац. Углавним, кажди рок меняме сценоґрафиї, та и то кошта. Векшина реквизитох нам стої у ґаражох, дацо я направим, алє, углавним, докупюєме кеди цо треба, у зависносци од мотивох – приповеда Саня, Борисова права рука.
А о заказованю и правилох фотоґрафованя, Ничичово гваря:
– Кед нас муштерия навола и закаже фотоґрафованє, нєт одредзене же кельо ше може затримац у нас. Фотоґрафованє заказуєме на кажду годзину, понеже час завиши од того кельо сцу слики, и чи дзеци нємирни. По нашим искуству, найпроблематичнєйше фотоґрафовац дзеци од 3 до 5 рокох, понеже вони уж шицко розумя, алє нє сцу слухац – приповеда покус у франти тота пара, а цо ше ценох дотика, як гваря, 400 динари кошта виробок календару, хтори правя на руским, сербским и мадярским язику, а 120 динари виробок єдней слики.
Зазначує ше окремни подїї
Окрем календарох и фотоґрафийох, Борис у своїм студию у Кули, хтори ше находзи у улїци Маршала Тита у пасажу, вирабя и слики на шолькох, пузлох, маїцох, привязкох, заглавкох, пирньовкох, рами за слики, а од Нового року планує хасновац и сценoґрафию за перши и 18 родзени днї. Кед слово о родзених дньох, окреме кед ше преславює полнолїтство, на 18 роки, приповеда Борис же то тераз прави спектакл. Памета 18. родзени дзень у Червинки на хторим були поволани 280 госци, а лєм музику того вечара домашнї плацели коло 1.200 евра. Таки луксузни вешеля єст вше вецей, но Керестурци, на щесце, гвари вон, нє нательо троша.
– Сликованє родзених дньох наплацуєме 10.500 динари. Ту ураховане хаснованє видео–биму, на хторим пущам видео о славенїкови, хтори тирва даяки 4 минути. Потим, ту ураховани и огньомет за торту, слики на хторих ше славенїк сликує зоз госцами, коло 10 слики на хторих лєм його портрети, а гевти шицки слики и двогодзинови видео зоз танцованя и вешеля славенїк достанє на флешу, крашнє запаковани до шкатулки. Кед слово о свадзбох, то кошта 600 евра, а подрозумює 200 виробени слики, а на флешу ше достанє и видео–знїмок котри тирва од 3 до 4 годзини. Ту ураховани и дим за перши танєц, пейц нукашнї огньомети, балони за торту, знїманє зоз дроном – толкує тот искусни фотоґраф.
На концу, без огляду чи слово о кресцинох, родзених дньох, свадзбох, преслави рижних шветох, або ше лєм сце зазначиц дацо окремне, кажда фотоґрафия ма свою вредносц. Вона нас здогадує же найкрасши хвильки тоти хтори дзелїме з другима.
