Лалитянє однєсли побиду

автор А. Медєши
177 Опатрене

РУСКИ КЕРЕСТУР – Ище єден Турнир у малим фодбалу отримани и того викенду на хторим наступели дзеци народзени 2014. року, а тераз титулу найлєпших позберала екипа „Панонияˮ з Лалитю. Турнир отримани внєдзелю 3. децембра, у Спортскей гали у Руским Керестуре, з нагоди 100-рочнїци Фодбалского клубу „Русинˮ, а окрем домашнього Русину, хтори завжал 3. место, участвовала и екипа „Младосц” зоз Крущичу хтора була друга.

Важне визначиц же Русинова екипа випочитовала догварку медзи тренерами же би на Турниру наступели виключно лєм дзеци хтори народзени 2014. року, док себе госци дали шлєбоду привесц бавячох хтори и по два роки старши. Но, госцом ше то витолеровало лєм прето же у Лалитю и Крущичу нєт досц дзеци за состав екипи.

Перши наступели млади фодбалере зоз Крущичу и Лалитю, дзе Лалитянє однєсли побиду з резултатом 3:1.

Потим, Керестурци бавели процив екипи Младосц зоз Крущичу и були поражени зоз 3:2. Ґоли за домашнїх дали Иван Надь и Лука Зелич.

Шлїдуюци стретнуце одбавели русиновци процив екипи Панония з Лалитю. Госци водзели зоз 3:0, а потим домашнї зменшую предносц на 3:1 дзекуюци Кристоферови Дудашови.

Русин наступел у составе – Андрей Маґоч, Давид Еделински, Страхиня Кршич, Тони Сивч, Лука Зелич, Филип Бурчак, Андрей Надь, Алек Малацко, Славиша Свирчев, Кристофер Дудаш, Иван Надь, Лука Бандич и Виктор Надь. Тренер, Зденко Шомодї.

Як и после каждого турниру, и внєдзелю шицким дзецом подзелєни медалї, а вельке подзекованє заслужує и бувши ґолман Русину, тераз тренер ґолманох, Мирослав Накич, хтори судзел цали турнир.

Того викенду у плану єдно приятельске стретнуце процив Искри з Коцура, дзецох возросту од 1. по 5. класу основней школи, а стретнуце найвироятнєйше будзе отримане на нєдзелю пополадню.

ПОВЯЗАНИ ТЕКСТИ