Матей Саянкович найлєпши ґолґетер лиґи

автор а. медєши, фото: в. вуячич
364 Опатрене

ПАРАҐИ – У остатнїм колу єшеньскей часци Першенства Подручней фодбалскей лиґи Зомбор, хторе одбавене внєдзелю 20. новембра, фодбалере Русина госцовали у Параґох дзе домашню екипу Будучносци победзели зоз 5:3 (4:3).

Ґоли за Русин дали – Матей Саянкович (2), Оґнєн Маркович, Янко Кулич и Филип Вуйович, а Саянкович преглшени и за найлєпшого ґолґетера у Лиґи.

Русин почал водзиц у 9. минути зоз ґолом Саянковича, но за крадки час, у 14. минути, домашнї виєдначую на 1:1. Зоз корнеру домашнї даваю и други ґол после хторого пребераю водство зоз 2:1. После водства домашнїх, Русиновци пребераю инициятиву и даваю за шором 3 ґоли. Перше Маркович виєдначує на 2:2, потим Кулич звекшує на 3:2, а вец Саянкович дава свой други ґол на тим стретнуцу, односно свой 13. ґол у тей першей часци сезони, и звекшує предносц на 4:2.

У надополнєню часу, у першей половки стретнуца, домашнї зменшую резултат на 3:4, зоз чим знова посцигую за себе активни резултат.

Друга часц стретнуца и надалєй динамична и полна зоз нагодами, но кед направени пенал, тераз за госцох над Саянковичом, Русинови ше ошмихли 3 боди. Сиґурни реализатор бул Филип Вуйович и то бул финални резултат того стретнуца.

На концу тей часци сезони, Русин зазначел найвецей побиди, аж 12, док першопласовани Гайдук зоз Стапару ма 11 побиди. Гайдук ма 4 нєришени стретнуца, а Русин ма єдно нєришене и 2 страцени стретнуца, но пре векшу ґол розлику Гайдук на першим, док Русин на другим месце.

ПОВЯЗАНИ ТЕКСТИ