КУЛА – Мемориялни турнир „Радован Вєштица – Бане” отримани всоботу, 26. октобра у Кули на стадиону ФК „Кула” на Ґедеру. На турниру участвовали и млади фодбалере ФК „Русин” и завжали штварте место.
На мемориялним турниру участвовали шейсц екипи, а бавели дзеци возросту 2015. рок, 3. класа, дзе у каждей екипи тиж могли участвовац и по троме бавяче народзени 2014. року.
За екипу Русина наступали: Лука Тасич, Андрей Чижмар, Стефан Такач, Дориян Попович, Дарко Еделински, Серґей Сабадош, Михайло Шомодї, Страхиня Кршич, Давид Еделински и Кристофер Дудаш.
Формат змаганя бул же кажда екипа бавела зоз кажду и потим перши штири пласовани екипи ишли до полуфинала, дзе бавели перши зоз штвартим а у другим стретнуцу бавели други зоз трецим.
Екипа Русина у полуфиналним стретнуцу бавела процив першопласованей екипи „Гайдук 1912” зоз Кули и страцела зоз минималним резултатом 1:0, док у стретнуцу за треце место млади фодбалере Русина страцели од екипи ФК „Кула” зоз резултатом 2:0.
Мемориялни турнир „Радован Вєштица – Бане” у Кули освоєла екипа зоз Червинки.