НОВИ САД – Тогорочни госци на манифестациї „Дужиянца” и у Новим Садзе и у Суботици були члени КУД „Жатва” зоз Коцура, цо догварка двох националних совитох.
Национални совит бунєвацкей националней меншини штварток, 8. авґуста у Новим Садзе зоз манифестацию Дужиянца означел єден зоз своїх штирох националних шветох.
Зоз жатвову шветочносцу „Дужиянца” означує ше конєц жатви, а у релиґиозним смислу представя подзекованє Богу за достати урожай. Тогорочни госци и на манифестациї у Новим Садзе и у Суботици були члени КУД „Жатва” зоз Коцура, цо догварка двох националних совитох же би ше представела и руска национална меншина.
Спред Националного совиту Руснацох бул подпредсидатель Стеван Самочета, предсидателька Одбору за културу и предсидателька КУД „Жатва” Мелания Мали и спред КУД „Жатва” члени Мария Сакач, Николина Маґоч и Андей Сабо.
На початку манифестациї у Новим Садзе положене квеце на спомин-плочу на будинку дакедишнього готела Маєр дзе отримана Велька народна скупштина. През центер Нового Саду бандаш и бандашки пошли зоз госцами, дзе були и Коцурци у руским народним облєчиве, до Музею Войводини.
Предсидателька Националного совиту Бунєвцох др Сузана Остоїч Куюнджич бешедовала о значеню Дужиянци за Бунєвцох и о тим же вони тот обичай преславюю вецей як 100 роки. У Музею Войводини, висши кустос и етнолоґ др Татяна Бугарски бешедовала о жатвових обичайох Бунєвцох и Руснацох у Войводини.
На манифестациї була подсекретарка Покраїнского секретарияту за култуту, явне информованє и одношеня зоз вирскима заєднїцами Вера Коїч, подсекретар Покраїнского секретарияту за привреду и туризем Славолюб Арсениєвич.
