То знак же нам потребне пошвидко обдумац и порихтац НОВУ СТРАТЕҐИЮ нашей заєднїци зоз потримовку и предкладанями и других котри присутни у нашим соживоту и так змоцнїц нашо досяги у наших правох, през котри ше тераз, у самим корчу, бориме лєм даскельо гарсцочки интелиґенциї. Исти свидоми того терашнього стану и кед вони, даяким концом престаню окончовац терашнї длужносци на очуваню нашого идентитету, велї потераз здобути права ше загаша.
Пред нами ище єден Нови рок. Пожадали зме себе и нашим найблїзшим фамелийом и познатим шицко найлєпше, а насампредз здравя и щесца у наиходзацих часох котри поставаю за нас, таких малочислених у нашей заєднїци, права спокуса за нашо очуванє.
На самим початку уж узвичаєно у нашим новим Руским християнским календаре на значни подїї у тим року назначени за нас шицки значни датуми нашей историйней прешлосци, як цо и рочнїци наших предкох и терашнїх интелектуалних представительох з нашого явного и вирского живота. Як и пред тим роком нашо институциї ше буду намагац голєм єдну часц зоз тих рочнїцох достоїнствено означиц и голєм на хвильку нас врациц и указац на тоти часи у котрих нашо предки водзели борбу и политику за здобуванє за нас нових правох у очуваню и розвиваню нашей заєднїци и идентитету.
Нє мож нє обачиц же ше їх справованє и сама борба за нашо права водзела по сам верх власци, а тиж и церкви зоз власним омасовйованьом и зоз власнима материялнима средствами. Та так вше кед требало вибориц ше вєдно зоз другима меншинскима заєднїцами, чийо тиж главни подїї зазначени у їх календарох, ми, таки мали, нє однїмали зме ше давац материялни средства же бизме нє заоставали у образованю, вири и култури за шицкима тима, цо доставали помоц и потримовку зоз своїх матичних жемох. Наш ше стан вше найбаржей операл на нас самих, а насампредз на церкву.
У прешлих дзешец рокох тоти пременки барз обачлїви и як таки пошвидшую нашу асимилацию и нашо зєдиньованє зоз другима заєднїцами котри маю вше векшу и материялно богатшу потримовку матичних жемох, та так вельо лєгчейше затримую и розвиваю свойо здобути, як дакеди так и нєшка, права на свойо очуванє идентитету.
Нашо здобути права, котри ше частейше як скорей, споминаю през найвисши державни институциї, а ми сами свидоми же наш стан постава алармантни, а тиж так и церкви и вири.
Вину зношиме шицки, вшелїяк, векшу тоти цо нас представяю пред власцу, и гоч як ше вони намагаю очувац заєднїцу, нашо стратеґиї, котрим уж з векшей часци вицекол и преґажел час, пре пременки котри ше одвиваю у нашим блїзшим и ширшим окруженю, вецей нє даваю анї охрабруюци резултати же ше тот таки стан злєпша. То знак же нам потребне пошвидко обдумац и порихтац НОВУ СТРАТЕҐИЮ нашей заєднїци зоз потримовку и предкладанями и других котри присутни у нашим соживоту и так змоцнїц нашо досяги у наших правох, през котри ше тераз у самим корчу бориме лєм даскельо гарсцочки интелиґенциї. Исти свидоми того терашнього стану и кед вони, даяким концом престаню окончовац терашнї длужносци на очуваню нашого идентитету, велї потераз здобути права ше загаша.
Преношенє истих и сама борба за очуванє зоз ґенерациї на ґенерацию скорей мала иншаки цек и вон бул менєй обачлїви, бо чувство тих котри ше указали и доказали зоз свою борбу у очуваню идентитету заєднїци мал и потребни за тот час розумни ступень шмелосци и витирвалосци у пренаходзеню ришеня у самим варху власци.
Гоч з велькей часци у прешлосци наша церква як цо и други нє могла ше так лєгко обрацац ґу свойому народу, заш лєм мала вельку улогу у каждей малей националней заєднїци, бо ше ґу истей, пре очуванє, приблїжовал вше вецей и вецей и сам народ, бо бул свидоми же так у тим духу вири и припадносци нє траци свой национални идентитет.
Пременки котри настали и наставаю нє зблїжую и повязую достаточно нашу заєднїцу, алє нови габи нємирох, войнох, та и климатских пременкох на самей планети пошвидко на тельо будзе уплївовац на сам способ живота же розсельованє загрожених будзе масовне, а уж и постава на простори, насампредз, там дзе єст можлївосци и сиґурносци за нови початки, дзе штучна интелиґенция ище вше нє на тельо запановала, дзе ище вше можлїве очувац присуство ґу миру и порозуменю зоз новима заєднїцами котри ше пошвидко буду формовац пре власне здобуванє своїх правох и очуваню власного идентитету за їх нашлїднїкох.
Тото цо при нас и пред державу обачлїве то нашо пошвидшане нєставанє, розсельованє, одход младих вишколованих ґенерацийох наших интелектуалцох у велїх сферох образованя, пре сам материялни и стан котри у спомнутим пошвидшано меня и власну свидомосц ґу припадносци, та и самей вири. Так би праве перши задаток НОВЕЙ СТРАТЕҐИЇ мал буц засновани на фундаменту духа наших предкох и вири на оживйованю свидомосци при нашим народу, та так голєм єден час, по нове ришенє, могло би зачувац и пребудзиц свидомосц у очуваню мацеринскей бешеди и знова приблїжиц нашу заєднїцу ґу вири и церкви, и пробовац наш материяли стан приблїжиц ґу истому, док тот стан цалком нє знїщи духовни.
Прето НОВА СТРАТЕҐИЯ за нашу заєднїцу то и початок ришованя стану у котрим ше тераз находзиме.