Руска заєднїца у Войводини наисце мала, так повесц, отримує нас язик, култура, образованє и информованє, тоти штири обласци котри у инґеренциї Националного совиту рускей националней меншини. Складаюци ше з тим же зме мала заєднїца, якошик ше подрозумює же ше исти мена зявюю у вецей обласцох, же исти особи активни у дружтвеним живоце своєй заєднїци, активни и у националним живоце. Так ше з рока на рок стретаме зоз фактом же ше на велїх конкурсох, у одборох и роботних целох и комисийох, зявюю исти людзе. Нє мож то вельо пременїц, бо добре же єст и хто. Медзитим, пре тото би цали процес мушел буц осторожно випровадзени, по ясних и строгих правилох и критериюмох.
Прешлого тижня, символични 350.000 динари по конкурсу розподзелєло Роботне цело за младих НСРНМ. На конкурс сцигли осем прияви, шицки оценєти як добри, та кажди проєкт достал финансийну потримовку. Медзитим, ношителє и одвичательни особи двох зоз тих осем проєктох, праве члени РЦ за младих котри и вихасновали нагоду представиц за цо конкурую, док други апликанти нє мали нагоду представиц свойо проєкти.
Укладанє до младих, то источашнє и укладанє до будучносци каждей заєднїци, и праве прето добре же Национални совит рускей националней меншини уж роками видвоює средства за проєкти котри реализую млади, або котри орґанизовани за младих. Важне же би шицки проєкти, и шицки учашнїки, мали исти условия, кед же єдни представяли свойо проєкти, вец таку нагоду требали мац и шицки други.
Праве ту наиходзиме на уж усталєну праксу, кед з рока на рок, ношителє проєктох одвичательни особи котри подписую тоти проєкти, одлучую о истих проєктох на конкурсу чиїх су целох члени.
Наисце же членство у одборох, або роботних целох нє шме буц препреченє за участвованє на конкурсох, бо дружтвена дїялносц ше лєм так отрима. Медзитим, праве таки ситуациї правя простор же би ше поставело питанє чи тоти поступки цалком нєпристрасни.
Здруженьом, младим и шицким другим ентузиястом котри дали себе до дружтвеного живота, потребна потримовка, алє им потребна и система котрей буду вериц. Прето би кажди конкурс требал буц нагода нє лєм за финансованє добрих идейох, алє и за указованє же исную ясни правила, єднаки критериюми, и єднака дистанца спрам шицких учашнїкох. На концу, строги правила, єднаки критериюми и транспарентносц нє шму буц препреченє роботи, алє фундамент успишней и добре зробеней роботи.